Ffurfiwch bwyllgor Bydd Barod
Fel pob ton Fecsicanaidd, gorau po fwyaf sy'n cymryd rhan!
Felly byddwch eisiau cynnwys cymaint â phosibl o fyfyrwyr yn eich prosiect brosiect rhwydwaith Bydd Barod prosiect.
I wneud hyn, byddwch angen ychydig o drefn. Felly, beth am sefydlu pwyllgor i gydlynu'r gwaith?
Rhannu'r pwysau gwaith
Yn eich tîm byddwch angen...
Cadeirydd - fydd yn gyfrifol am arwain cyfarfodydd. Mae hwn yn sicrhau bod pawb yn cadw at yr agenda, bod pawb sydd eisiau lleisio barn yn cael gwneud hynny, y gwneir penderfyniadau, a bod cyfarfodydd yn dechrau ac yn gorffen yn brydlon. Weithiau mae pwyllgorau yn cylchdroi'r rôl yma, fel bod pawb yn cael tro.
Ysgrifennydd - sy'n sicrhau bod gan bawb y wybodaeth angenrheidiol. Hwn sy'n rhoi gwybod i bawb am ba bryd a lle y cynhelir cyfarfodydd ac yn dosbarthu'r agenda. Gall hefyd helpu'r cadeirydd i ysgrifennu'r agenda. Yn ystod cyfarfodydd mae'n gwneud y cofnodion, wedyn yn eu hysgrifennu, yn eu dosbarthu, ac yn ffeilio copi. Gall ysgrifennydd hefyd ysgrifennu a derbyn llythyrau ac e-bostiau ar ran y pwyllgor.
Aelodau - mae y rhain eisiau bod yn rhan o'r gwaith hefyd Maet yn hapus i drafod syniadau, helpu i wneud penderfyniadau a chymryd cyfrifoldeb am dasgau penodol, er enghraifft, gwneud arolygon, cyflwyniadau, gofyn am ganiatâd etc. Gall fod yn syniad da i sicrhau bod gennych amrywiaeth dda o aelodau.
Swyddogaethau eraill...
Cydlynydd Cyhoeddusrwydd - sy'n sicrhau bod cymaint â phosibl o bobl yn gwybod beth sy'n digwydd. Gall hyn olygu ysgrifennu ar flog yr ysgol, cynllunio taflenni a phosteri, ysgrifennu at lywodraethwyr yr ysgol a siarad â'r wasg leol.
Aelod Anrhydeddus - a all fod yn athletwr, artist, actor neu gerddor lleol neu arweinydd cymdeithas a all fynychu efallai un neu ddau o gyfarfodydd y flwyddyn a rhoi eu cefnogaeth.
Siaradwyr gwadd - a allant fod yn ffordd wych o gael gwybodaeth. Er enghraifft, os dewiswch wneud murlun Llundain 2012, fe allwch wahodd artist lleol sydd wedi gwneud murlun o'r blaen i ddod atoch i siarad am 10 munud ar sut i roi cychwyn arni.
Beth yw agenda?
Yn syml, rhestr o bwyntiau i'w trafod mewn cyfarfod (gydag amseriad wrth ochr pob un). Fel hyn gallwch sicrhau eich bod yn ymdrin â phopeth.
Er enghraifft:
- Diolch am ddod (1 mun)
- Cyflwyno unrhyw aelodau newydd (2 fun)
- Ymddiheuriadau (2 fun)
- Pwynt 1 i'w drafod (10 mun)
- Pwynt 2 i'w drafod (15 mun)
- Pwynt 3 i'w drafod (5 mun)
- Unrhyw fater arall (5 mun)
- Dyddiad y cyfarfod nesaf (2 fun)
Cynghorion i'r Cadeirydd
- Cyflwynwch pob eitem ar yr agenda yn fras.
- Peidiwch â chymryd yn ganiataol bod pobl yn gwybod am yr hyn yr ydych yn siarad amdano! Weithiau ni fyddan nhw, felly eglurwch unrhyw faterion cyfredol.
- Cadwch lygaid ar yr amser bob amser, ac os yw'n angenrheidiol symudwch bethau'n eu blaenau, er enghraifft, 'Rwyf am roi tri munud arall i'r drafodaeth hon ac yna dod â hi i ben.'
- Os yw rhywun yn crwydro oddi wrth yr agenda, peidiwch â chael eich tynnu gydag o, dywedwch er enghraifft, "Mae hwnna'n bwynt pwysig, gawn ni ddod yn ôl ato nes ymlaen?"
- Rhowch daw ar sgwrsio preifat cyn gynted â'u bod yn dechrau!
- Sicrhewch bod pob barn yn cael ei chlywed - yn cynnwys y rhai nad ydych efallai'n cytuno â hwy.
Beth yw cofnodion?
Y rhain yw nodiadau ar gyfarfod - beth yr ydych wedi penderfynu ei wneud, pwy sydd am ei wneud, erbyn pryd etc. Maen nhw'n atgoffa pobl o'r hyn a gytunwyd arno, ac hefyd yn rhoi gwybod beth sy'n digwydd i'r aelodau nad oedd yn gallu mynychu cyfarfod.
Beth sy'n gwneud cyfarfod da?
Mae angen tipyn o drefn ar gyfarfod da, felly gosodwch ychydig o reolau a gofalwch bod pob aelod yn cael copi ac yn cadw atynt. Er enghraifft:
- 'Siaradwch drwy'r cadeirydd' - mae hyn yn golygu rhoi eich llaw i fyny a disgwyl eich tro.
- Peidiwch â siarad ymysg eich gilydd, na thorri ar draws eraill.
- Cadwch at yr agenda. Dylid trafod unrhyw bwyntiau eraill dan 'unrhyw faterion eraill'.
- Cadwch unrhyw gyfraniadau'n fyr ac i bwrpas.
